Anëtarë të LRI-së dhe kryetarja e LSI-së Monika Kryemadhi kanë dhuruar gjak me rastin e 15 vjetorit të krijimit të partisë Lëvizja Socialiste për Integrim.
Gjatë fjalës së saj për mediat, Kryemadhi tha se të gjitha angazhimet politike apo shoqërore të LSI-së janë për të ndihmuar njerëzit, teksa shtoi se përgjegjësia sociale duhet kthyer dhe në përgjegjësi politike për të ecur përpara.
Kryemadhi iu bëri thirrje të gjithë shqiptarëve të dhurojnë gjak, duke theksuar se kjo jo vetëm që është e shëndetshme për trupin, por edhe ndihmon të gjithë ata që kanë nevojë.
“Përfitoj nga rasti që në këtë përgjegjësi sociale të Lëvizjes Rinore për Integrim të fillojmë ditën e 15 vjetorit të LSI. Uroj të gjithë anëtarët e LSI dhe simpatizantët e saj kudo që janë gëzuar ditëlindjen. E fillojmë këtë ditë festimesh me një përgjegjësi sociale, “dhuro gjak, dhuro një jetë”. Të gjitha angazhimet tona politike apo shoqërore janë për të ndihmuar njerëzit dhe për të shpëtuar jetë njërëzish. Përgjegjësia jonë sociale duhet kthyer dhe në përgjegjësi politike për të marrë përsipër përgjegjësitë tona dhe për të ecur përpara. Sot, në këtë ditë të 15 vjetorit të LSI, falenderoj të gjithë të rinjtë dhe të rejat që dhurojnë gjak dhe i bëj thirrje të gjithë shqiptarëve që të dhurojnë gjak sepse në fund të fundit është dhe e shëndetshme për të gjithë ne, sidomos për ne mbi moshën 45 vjeç është e shëndetshme për trupin dhe për organizmin por mbi të gjitha iu japim një jetë më shumë të gjithë atyre që kanë nevojë. Gëzuar të gjithëve dhe mirutakofshim në takimin e pasdites.”, tha Kryemadhi./Opinion.al
