Partia Demokratike ka reaguar për rritjen e rasteve me koronavirus që u raportua sot nga Instituti i Shëndetit Publik.
Në përditësimin e të dhënave, sot u njoftua për 25 raste të reja nga të cilat 15 ishin në një call center në Tiranë. Ish-deputeti Bardh Spahia shkruan se ato janë ilustrimi kokëfortë i dështimit të qeverisë në marrjen e masave për të mbrojtur shëndetin e qytetarëve.
Ai thekson se PD ngriti që në fillim zërin për mbylljen e call centerave dhe fasonëve pasi përbëjnë vatra të mëdha rreziku por kjo thirrje nuk u dëgjua nga qeveria. Sipas tij këto aktivitete nuk u mbyllën pasi qeveria nuk donte të paguante pagat e tyre.
“Ato nuk u ndihmuan me asnjë qindarkë nga qeveria, duke i lënë në vështirësi serioze financiare e sidomos duke rrezikuar shëndetin! Kjo nuk është thjesht papërgjegjëshmëri, pasi vatra të tilla janë kthyer në fakt kokëfortë të politikës kriminale në një situatë pandemie, ku shëndeti i qytetarëve duhet të jetë i pari. Edi Rama do të mbetet në histori si inividi që shfrytëzoi një pandemi për të fituar përmes tenderash sekretë e me cmime stratosferike, që dha fare pak lëmoshë si kompensim për shkatërrimin ekonomik që i solli biznesit e familjeve shqiptare, e sidomos me makutërinë për të mos kompensuar sipërmarrje si call centerat apo fasonët, që u kthyen në vatra të rrezikshme infektimi me Covid-19.”- shkruan Bardh Spahia. /Opinion.al
