Policia e Tiranës ka reaguar përmes një njoftimi zyrtar për pretendimet se një 14-vjeçar është dhunuar në ambientet e komisariatit më datë 12 Prill.
Njoftimin për këtë rast e ka thënë Komiteti Shqiptar i Helsinkit, ku thotë se i mituri ishte shoqëruar në komisariat për hedhje të lëndëve piroteknike te Liqeni Artificial dhe ndaj tij është ushtruar dhunë nga 3 punonjës të Policisë.
“Në lidhje me një njoftim të Komitetit Shqiptar të Helsinkit, sipas të cilit gjatë qëndrimit në ambientet e Komisariatit të Policisë Nr. 1, është dhunuar një i mitur i ndaluar, sqarojmë: Me datë 12.04.2025, shërbimet e Komisariatit të Policisë Nr. 1 kanë shoqëruar në ambientet e këtij komisariati, 14-vjeçarin që pretendon se është dhunuar, mbi dyshime se kishte hedhur lëndë piroteknike, në zonën e Liqenit Artificial, veprim i cili ishte njoftuar nga banorët e zonës, pasi ishte shkaktuar panik dhe shqetësim te ta.
Për këtë shtetas Policia referoi materialet në Prokurori, ku u vendos procedimi i tij në gjendje të lirë, për veprën penale “Prishja e qetësisë publike”.
Për këtë rast është dhënë njoftim në përmbledhjen ditore të qarkut Tiranë, më datë 13.04.2025. Në bazë të pretendimeve të prindërve të të miturit, se ai është dhunuar gjatë qëndrimit në ambientet e Komisariatit, me urdhër të Drejtorit të Drejtorisë Vendore të Policisë Tiranë, me datë 13.04.2025, ka nisur ecuri disiplinore, për shkelje të rëndë, për:
-Inspektor R. D., oficer i Patrullës së Përgjithshme të Komisariatit të Policisë Nr. 1;
-Nënkomisare Xh. B., specialiste e Seksionit të Patrullës së Përgjithshme dhe Rendit të Komisariatit të Policisë Nr. 1.”, njofton policia.
AMP ka referuar materialet në Prokurori për hetimin e 3 punonjësve të Policisë për “Kryerje të veprimeve arbitrare” dhe “Dëmtime të tjera me dashje”.
