Ambasada amerikane në Tiranë ka reaguar në lidhje me zgjedhjet vendore që do të mbahen më 14 maj.
Në një postim në rrjetet sociale, ambasada e SHBA u bën thirrje partive politike dhe institucioneve që të punojnë me qëllim që zgjedhjet të plotësojnë standardet ndërkombëtare.
Sipas saj, zgjedhjet janë themeli i demokracisë dhe për këtë arsye autoritetet shqiptare duhet të sigurojnë që zgjedhjet të jenë transparente, të lira dhe të sigurta.
Ndër të tjera, rikujton se SHBA do të mbështesi vullnetin e popullit shqiptar për demokraci të fortë, siç ka bërë gjatë viteve.
“Të dielën, qytetarët shqiptarë do të ushtrojnë të drejtën e tyre demokratike më themelore – të votojnë për udhëheqësit dhe të ardhmen e tyre. Ambasada e Shteteve të Bashkuara u bën thirrje të gjitha partive politike dhe institucioneve që të sigurojnë që veprimtaritë zgjedhore të kryhen në përputhje me ligjin shqiptar dhe me standardet ndërkombëtare. Autoritetet shqiptare duhet të sigurojnë që zgjedhjet të jenë transparente, të lira dhe të sigurta.
Ashtu si në procese të mëparshme, përfaqësues ndërkombëtarë, përfshirë nga ambasada e SHBA do të udhëtojnë përreth vendit si vëzhgues në zgjedhje. Zgjedhjet janë themeli i demokracisë. Drejtuesit e partive patën detyrimin të propozojnë kandidatë të pastër, të denjë për të përfaqësuar popullin shqiptar dhe tani vendimi duhet të jetë në dorën e qytetarëve. Siç kemi bërë gjatë tre dhjetëvjeçarëve të shkuar, Shtetet e Bashkuara do të mbështesin vullnetin e popullit shqiptar për demokraci të fortë”, njofton ambasada e SHBA./Opinion.al
