Agjencia Evropiane e Mjedisit bën të ditur se 14% e vdekjeve në Evropë shkaktohen nga faktorë mjedisorë. Veçanërisht ndotja e ajrit lidhet ngushtë me sëmundje të rënda, përfshirë tumoret, sëmundjet respiratore dhe ato kardiake.
Nisur nga këto të dhëna, del e nevojshme që ligji evropian për ruajtjen e natyrës, në fuqi që prej Qershorit 2024, të zbatojë edhe programe të posaçme për shëndetin, duke ndjekur si shtyllë modelin që e lidh shëndetin e njeriut ngushtë dhe në mënyrë të pandarë me shëndetin e kafshëve dhe të ekosistemit.
Sipas institucioneve të Bashkimit Evropian, duhet ndërhyrë dhe vijuar puna me këtë qasje, pasi rehabilitimi i habitateve dhe mbrojtja e mjedisit e biodiversitetit duhet të zbatohen sa më shpejt dhe me rigorozitet të lartë në të gjitha vendet anëtare, e jo vetëm.
Qëllimi është të punohet më shumë për parandalimin e dëmeve dhe të promovohet zbatimi i projekteve në mbrojtje të shëndetit të njeriut, përmes përmirësimit të cilësisë mjedisore, stilit të jetesës dhe diagnozave më të shpejta e më të hershme për sëmundjet e rënda.
Pra, kërkimet shkencore dhe përparimet në të gjitha fushat na rikujtojnë se njeriu ka lindur në natyrë, dhe si i tillë, është thellësisht i lidhur dhe i ndërvarur prej saj dhe prej kafshëve, për të pasur një jetë të shëndetshme. TvKlan
