Presidentja e Meksikës Claudia Sheinbaum tha sot se ka nisur hetimi për vdekjet tragjike të 13 fëmijëve në katër spitale të Meksikës qendrore, që dyshohet se janë shkaktuar nga kontaminimi i serumeve ushqyese.
“Është shumë e trishtë kjo që ndodhi, së pari duhet të kujdesemi për familjet. Ne besojmë se vdekjet që ndodhën në katër spitale kanë ndodhur nga kontaminimi i serumit me bakterie. Ne kemi ndërprerë kontratën dhe regjistrimin që kompanitë kishin për ushqimin e fëmijëve, shumica ishin foshnje”, tha presidentja, duke shtuar se sapo të zbulohej shkaku i saktë do të bëhej publik.
Qeveria thotë se solucioni ushqyes që u jepej të vegjëlve me injeksion në spitalet e fëmijëve, është kontaminuar me bakterie, shkruan rrjeti AFP.
Në fund të nëntorit në spitalet pati një përhapje të bakterit ‘Klebsiella oxytoca’ për të cilin zyrtarët thanë se kishte lidhje me solucionin ushqyes që i jepej fëmijëve.
Autoritetet thanë se në total kishin identifikuar 20 infeksione të mundshme Klebsiella oxytoca, dhe se aktualisht janë nën kurim shtatë fëmijë.
‘Klebsiella oxytoca’ është një bakter që raportohet se shkakton infeksione në spitale si pneumonia dhe ato të rrugëve urinare me anë të helmimit të gjakut.
Zyrtarët e shëndetësisë thonë se fëmijët më të rrezikuar nga bakteri në spitale janë “pacientët që përdorin ventilatorë frymëmarrjeje, ose kateter intra-venoz, si dhe ata që kanë pirë kura të gjata me anti-biotikë.
