Banorët e më shumë se gjysmës së bashkive në vend, do të përfitojnë nga strehimi social për rikonstruksionin e banesës me buxhetin e shtetit.
Nga 61 bashki në rang vendi, 35 prej tyre kanë përfituar nga programi i strehimit social për të ndihmuar familjet e varfra, banesa e të cilëve është në kushte të këqija.
Në ministrinë e Ekonomisë, thonë se bashkitë e Shkodrës, Devollit dhe Vaut të Dejës, kanë numrin më të lartë të qytetarëve të cilët do të përfitojnë pothuajse një banesë të re të rikonstruktuar.
“Ky program vjen në ndihmë familjeve që kanë një banesë në pronësi dhe që mund ta kenë në proces legalizimi, banesa e tyre ka probleme teknike ndërtimore, probleme të ndryshme si në çati, dyer, dritare, hidrosanitare, në termoizolim, probleme teknike ndërtimore që janë të domosdoshme që nëpërmjet buxhetit të shtetit, tashmë të gjitha këto familje i nënshtrohen restaurimit të banesës.
Ndryshe nga vitet e kaluara shikojmë që numri i aplikuesve dhe përfituesve këtë vit është dyfishuar, 1253 familje, që i përkasin 35 bashkive të vendit”, tha Dardana Grabovaj, drejtore e Drejtorisë së Strehimit Social.
Është 1 miliardë lekë fondi i vënë në dispozicion për rikostruksionin e plotë të banesave të përfituesve.
Numri më i ulët i aplikuesve dhe përfituesve u përket bashkive Peqin, Sarandë dhe Tiranë.
“Bashkitë të cilat kanë aplikuar, me numrin më të lartë janë bashkia Selenicë, Devolli, Librazhdi, Memaliaj, Mati, më pas vijnë të tjera në rënditje, me një fond prej 1 miliardë lekësh”, tha Grabovaj.
Por kush mund të përfitojë nga ky program i cili hapet çdo vit?
“Janë familje me ndihmë ekonomike, persona me aftësi të kufizuar, nëna kryefamiljare, emigrantë të rikthyer, familje që i përkasin minoriteteve rome dhe egjiptiane, të ardhurat e tyre janë të ulëta ose pa të ardhura fare”,sqaron Grabovaj.
Aplikimet e reja pritet të hapen në fund të këtij viti.
Tv Klan
