Në 12 vjetorin e krijimit të Lëvizjes Socialiste për Integrim, kryetari i saj Ilir Meta ka folur për disa çështje politike. Nga një aktivitet në një shkollë në zonën e ‘Farkës së Vogël”, Meta ka folur mbi koalicionin qeverisës PS-LSI ku ka thënë se për forcën politike që drejton nuk ka rëndësi se ku do të jetë në 2017, por a do të integrohet vendi në Bashkimin Europian.
“Shqipëria ka nevojë për bashkëpunim. Duhet të shkëlqejë Shqipëria duke i çuar në drejtimin pozitiv të gjithë shqiptarët këtu. Për LSI nuk ka rëndësi zgjedhjet, por ku do jetë Shqipëria pas zgjedhjeve të 2017. LSI është e përqendruar në ecurinë e suksesshme të reformës në drejtësi, reformave të tjera që janë kyçe për integrimin dhe shpresojmë në një rekomandim pozitiv nga Komisioni Europian dhe vendet anëtare sesa rezultati i zgjedhjeve dhe ku do jetë çdo forcë politike”, tha Meta.
I pyetur nga gazetarët për mundësinë e lëvizjes së ndonjë ministri në kabinetin qeveritar, Meta ka theksuar se nuk është fatkeqësi të mos jesh ministër.
“Nuk është fatkeqësi të mos jesh ministër apo kryetar parlamenti, apo pozitë pushteti, fatkeqësi është të mos kesh bukë për fëmijët, një shtëpi, mundësi që të çosh në shkollë fëmijët, të jesh ministër e në pushtet është përgjegjësi”, deklaroi Meta.
