“Një furtunë e errët me tri drita të bardha”. Ky ishte përkufizimi i Desara Lleshit për jetën e saj gjatë rrëfimit për programin “Rudina” në Tv Klan. 25-vjeçarja është nënë e tri vajzave të cilat kanë ardhur në jetë brenda 4 viteve.
Ato janë bekimet më të mëdha në jetën e Desarës, por për të s’ka qenë e lehtë. Në trupin e saj gjenden 11 shenja ndërhyrjesh kirurgjikale, të nisura prej moshës 1-vjeçare. 3 prej tyre u përkasin lindjeve të vajzave që po ashtu s’kanë qenë të lehta.
Desara Lleshi: Isha vetëm 1 vjeç kur kuptova që kisha një problem shëndetësor me kockat. Kjo është lufta, më saktë, e dy prindërve të mi.
Rudina Magjistari: Ti ke qenë akoma e vogël për ta kuptuar.
Desara Lleshi: Nuk kuptoja realisht çfarë po ndodhte sepse sot që jam nënë e kuptoj më së miri, por në atë kohë jo. Ishte koha kur unë hyra në opereacion për herë të parë në moshën 1-vjeçare për kockat dhe kjo më zgjati 1 herë në 5 vjet. Çdo 9 muaj unë bëja një ndërhyrje dhe e di që për prindërit e mi kjo ka qenë sfida e parë më e dhimbshme. Pastaj vazhdova me operacione të tjera që ishin të ndryshme dhe deri në 2024 kur bëra vajzën e tretë.
Rudina Magjistari: Pra ti kur numëron ato 11 operacionet, përfshin edhe 3 cezarianët që ke pasur për vajzat.
Desara Lleshi: Të marrësh 11 thika në trup, për mua është e rëndë në njëfarë mënyre, por unë ia dola dhe sot jam këtu.
Në moshën 20-vjeçare, Desara u bë nënë për herë të parë. Pas këtij gëzimi, do të vinte një tjetër furtunë me shtatzëninë e dytë ku priste binjakë. Fatkeqësisht, aty përjetoi një traumë të vërtetë dhe djali humbi jetën, ndërsa vajza, drita e dytë e Desarës, mbijetoi.
Desara Lleshi: Për kohën që unë kam qenë shtatzënë me gocën e dytë… Aty ka qenë pjesa që unë e kam përjetuar seriozisht ç’do të thotë të kalosh një traumë, unë e marr traumë atë.
Rudina Magjistari: Pse?
Desara Lleshi: Diara, në momentin që unë e kam marrë vesh që kam qenë shtatzënë, unë kam qenë shtatzënë me binjakë. Kur shkoj bëj kontrollin, mua më thonë që ti ke binjakë dhe është një vajzë e një djalë. Realisht isha shumë e lumtur, por pas pak kohësh marr vesh që isha në një gjendje të rëndë, nuk merrja dot as frymë atë ditë.
Rudina Magjistari: Në cilin muaj ishe të shtatzënisë?
Desara Lleshi: Në muajjin e pestë të shtatzënisë dhe vazhdoi të formohej më shumë sesa ishte më parë. di që kam shkuar thjesht për një kontroll. Në momentin që unë kam hyrë në spital, i gjithë spitali bërtiste dhe thoshte që këtu po abortojnë të dy. Në ato momente mendoja vetëm o Zot, të lutem më ndihmo, për mua s’ka rëndësi, sot është ajo që duhet të kemi një djalë, por tek unë, unë s’kam pasur një motër vetë dhe unë kam thënë o Zot, të lutem më jep një vajzë që t’i bëj një motër, për djalë nuk e kam pasur ndonjëherë. Unë kam dashur të shpëtojë realisht Diara, pavarësisht se dëshira ime ishin të dy, por në një moment që unë e dija që është duke rrezikuar jetën njëri, thoja dua të shpëtojë Diara, emrin e kisha pa shpëtuar Diara akoma. Ashtu ndodhi, shpëtoi Diara.
Desara është në proces divorci me bashkëshortin, por nuk ndau detaje rreth dinamikës së martesës apo vendimit për zgjidhjen e saj./tvklan
