Sokol Bizhga, zëvendësdrejtor i Përgjithshëm i Policisë së Shtetit në tryezën e diskutimit për procesin zgjedhor u shpreh se uniformat blu kanë qenë të angazhuara për sigurimin e rendit dhe qetësisë publike, para, gjatë dhe pas përfundimit të procesit zgjedhor.
Zëvendësdrejtori Bizhga ndër të tjera ka theksuar se skuadrat e përbashkëta mes Policisë së Shtetit, Prokurorisë së Përgjithshme dhe SPAK rezultuan shumë pozitive. Ai tha se si rezultat i bashkëpunimit dhe kontaktit të vazhdueshëm me prokuroritë u arrit të realizohej një proces zgjedhor i qetë.
“Për sigurimin e rendit dhe qetësisë publike, përpara, gjatë dhe pas përfundimit të procesit zgjedhor strukturat policore planifikuan masa efektive për përmbushjen e detyrimeve, me qëllim sigurimin e qetësisë publike. Për garantimin e të drejtës, së çdo shtetasi për të votuar në mënyrë të barabartë dhe pa u diskriminuar, për evidentimin në regjistrin e posaçëm të çelura në çdo drejtori e komisariat policie, të gjitha njoftimeve për krime zgjedhore, trajtimin e tyre në me përparësi dhe kryerjen e veprimeve procedurale për çdo rast.
Për përmbushjen e këtyre detyrave kemi bashkëpunuar ngushtë me KQZ, organet e pushtetit vendor, OSBE dhe të gjitha organizatat e tjera të përfshira në këtë proces. Së bashku me Prokurorinë e Juridiksionit të Përgjithshëm, SPAK për parandalimin, dokumentimin dhe goditjen e paligjshmërisë në dëm të procesit zgjedhor rezultoi shumë pozitive. Skudarat e përbashkëta ishin shumë të suksesshme. Në bashkëpunim me prokuroritë përkatëse kemi aplikuar metoda proaktive dhe gjithashtu mbajtëm kontakte të pandërprera me strukturat e tjera shtetërore dhe aktorë të tjerë që bashkërisht kontribuan për realizimin e procesit zgjedhor të qetë dhe të sigurt”, u shpreh Bizhga.
