Komisioni i Ankimimeve dhe Sanksioneve vendosi të rrëzojë kërkesën e Partisë Demokratike për të shpallur të pavlefshme zgjedhjet e 11 Majit në qarqet e Tiranës, Fierit, Durrësit dhe Elbasanit.
Tashmë i hapet rruga certifikimit zyrtar të rezultatit të zgjedhjeve nga Komisioneri Shtetëror i Zgjedhjeve, Ilirjan Celibashi.
Tirana, Fieri, Durrësi dhe Elbasani janë qarqet e fundit të mbetura pa u certifikuar, kjo për shkak të rinumërimit. Kujtojmë se procesi, me kërkesë të opozitës, zgjati plot tre javë. Me rihapjen e kutive, Partia Demokratike humbi më shumë vota nga ç’kishte marrë më 11 maj.
Lëvizjet e votave në Tiranë, për anëtarët e KAS ishin si rezultat i gabimeve njerëzore gjatë raundit të parë të rinumërimit, ndërsa për qarkun e Fierit u vu re një fenomen shqetësues, ai i tjetërsimit të votave brenda kandidatëve.
Anëtarët e KAS ngritën dyshime edhe për krime zgjedhore nga numëruesit. Pavarësisht disa ndryshimeve, përbërja e Parlamentit të ri qëndroi e “paprekur”.
