Forcat e Armatosura Shqiptare shënojnë sot 108-vjetorin e krijimit. Presidenti Meta dhe Kryeministri Rama kanë kujtuar këtë ditë, duke shprehur vlerësimet për punonjësit në radhët e tyre.
Mision kushtetues për të qënë në shërbim të qytetarëve në nevojë e cilëson Presidenti veçanërisht në këto momente, punën e Forcave të Armatosura të Shqipërisë.
“Me rastin e 108-vjetorit të krijimit të Forcave të Armatosura të Republikës së Shqipërisë, ju shpreh sot të gjitha grave dhe burrave në uniformë, konsideratat më të larta, urimet më të përzemërta, falënderimin dhe mirënjohjen e thellë për kontributet, përkushtimin dhe sakrificat në mbrojtje të Atdheut, Sigurisë Kombëtare, por edhe garantimit të lirisë, paqes e stabilitetit në rajon e botë, nën flamurin e NATO! Edhe ky përvjetor, pas tërmetit tragjik të vitit të kaluar, na gjen në një periudhë të pazakontë dhe tepër të vështirë, të shkaktuar nga pandemia COVID-19. Koha shtron si domosdoshmëri një solidaritet mbarëkombëtar, bashkëpunim dhe gjithëpërfshirje, për të mposhtur këtë armik të përbashkët, që kërcënon çdo ditë shëndetin dhe jetën e qytetarëve. Duke përgëzuar Forcat tona të Armatosura, veçanërisht Njësinë Mjekësore Ushtarake, për vigjilencën, gatishmërinë e përkushtimin në krye të detyrës, në Spitalin e Traumës dhe në çdo repart e strukturë të FA, ju inkurajoj të vijoni në përmbushje të misionit tuaj kushtetues, për të qënë kurdoherë në shërbim të qytetarëve në nevojë”, shkruan ndër të tjera presidenti Meta.
Ndërkohë, Kryeministri Rama përmes një videoje shpreh respekt dhe vlerësim për punën dhe të gjithë ata që kanë shërbyer në radhët e Forcave të Armatosura të Shqipërisë.
“Mirëmëngjes dhe me shprehjen e respektit më të madh, për çdo shqiptar e shqiptare që në këta 108 vjet, ka shërbyer në radhët e Forcave të Armatosura të Shqipërisë, ju uroj një ditë të mbarë”, shkruan Kryeministri Rama./Opinion.al
