Rusia vijon të shënojë për të gjashtën ditë radhazi më shumë se 10 mijë të prekur të rinj në ditë nga pandemia e koronavirusit.
Në 24 orët e fundit në Rusi u regjistruan 10, 699 persona të tjerë pozitiv ndaj Covid-19, duke e çuar bilancin total të të infektuarve në mbi 187 mijë.
Gjithashtu u regjistruan dhe 98 humbje jetësh që e çuan numrin e pacientëve që kanë humbur jetën nga koronavirusi në 1723.
Zona më e goditur nga pandemia vijon të jetë ajo e Moskës, ku autoritetet kanë vendosur dhe masat më shtrënguese.
Kryebashkiaku i Moskës, Sergei Sobyanin tha se numri i vërtetë i infeksioneve në kryeqytetin rus ishte rreth 300,000, ose më shumë se trefishi i shifrës zyrtare. Ai shtoi se numri i rasteve po rritet ndjeshëm sepse autoritetet kishin dyfishuar sasinë e testeve që po kryenin në Moskë.
“Fakti që ne kemi identifikuar kaq shumë njerëz të sëmurë është një plus i madh, jo një minus,” tha Sobyanin për televizionin shtetëror. /Opinion.al
