Covid -19 është 10 herë më vdekjeprurës se gripi i derrit që shkaktoi një pandemi globale në vitin 2009. Kështu ka bërë me dije të hënën kreu i OBSH, që theksoi se për ndalimin përfundimtar të transmetimit duhet vaksina. Tedros Adhanom Ghebreyesus bëri një përmbledhje të shkurtër virtuale nga Gjeneva ku njoftoi se organizata ishte duke ndjekur në mënyrë të vazhdueshme çdo zhvillim lidhur me virusin që deri tani u ka marr jetën 115,000 personave dhe ka infektuar më shumë se 1.8 milionë njerëz në të gjithë globin.
“Ne e dimë që COVID-19 përhapet shpejt dhe e dimë se është vdekjeprurës, 10 herë më vdekjeprurës se gripi pandemik i vitit 2009,” tha ai.
OBSH thotë se 18,500 persona humbën jetën nga gripi H1N1, që u zbulua së pari në Meksikë dhe më pas në Shtetet e Bashkuara të Amerikës gjatë vitit 2009. Megjithatë revista mjekësore “Lancet” mendon se shifra e vdekjeve nga ky grip shkon nga 151,700 deri në 575,400 persona, duke përfshirë edhe vdekjet në Azi e Afrikë, që nuk janë numëruar nga OBSH.
Tedros tha të hënën se disa vende po përballen me dyfishin të rasteve çdo 3 apo 4 ditë, por shtoi se nëse shtetet do të bëjnë zbulimin, testimin, izolimin dhe gjurmimin e shpejtë të rasteve, ata mund ta mposhtin virusin.
Tedros pohoi se lidhjet globale të botës e rrisin rrezikun e vazhdimësisë së sëmundjes dhe ndonëse u përhap shumë shpejt, virusi do të largohet shumë më ngadalë. “Masat shtrënguese duhet të lirohen gradualisht dhe me kontroll. Hapja nuk mund të bëhet menjëherë”, tha ai duke shtuar se zhvillimi i një vaksine do të ishte rruga e sigurt e ndërprerjes së virusit./Opinion.al
