Nuk ka ende asnjë autor të dyshuar për vrasjen e Artan Cukut. Policia ka vendosur të rrisë shpërblimin për informatorët. Pra qytetarët që kanë dijeni dhe mund të identifikojnë atentatorin do të shpërblehen me 10 milionë lekë.
Vetëm pak ditë më parë në media u publikua edhe një video nga kamerat e sigurisë që e tregon killerin teksa vraponte fill pas krimit.
Identikiti i tij ishte zbuluar edhe nga dëshmitarët që e kishin parë në vendngjarje, ditën e krimit por edhe ditë të tjera në kafen aty pranë. Bëhet fjalë për një djalë të gjatë e të dobët, me kapele në kokë dhe që fliste me theks nga Veriu.
Që prej 8 prillit kur edhe u vra me 5 plumba komisari i ndjerë, policia ka pasur telefonata, por asgjë të vlefshme për hetimin. Kujtojmë se për këdo që jep informacione ruhet anonimati.
