Pas rreth një muaj hetimi dhe vëzhgimi policia e shtetit ka dhënë detaje në lidhje me kontinierët më kokainë në Durrës, pasi u njoftuan nga autoritetet greke.
Në një konferencë për mediat, drejtori i përgjithshëm i Policisë së Shtetit, Ardi Veliu tha se në operacionin ndërkombëtar antidrogë “KUITO” u sekuestruan 137 kg lëndë narkotike kokainë. Pjesë e operacionit ka qenë dhe DEA amerikane.
“Policia Shqiptare organizoi dorëzimin e kontrolluar pas miratimit dhe lejimit nga Autoritetet Greke, procedura të cilat filluan nga pala shqiptare që në muajin gusht 2019 dhe përfunduan sot më datë 27.09.2019. Gjatë kësaj periudhe u realizuan disa takime operacionale nga Policia e Shtetit me Autoritetet Policore Greke dhe Zyrën e DEA-s. Këto takime u realizuan në Tiranë dhe në Athinë për shkëmbimin e informacioneve dhe mbarëvajtjen e operacionit që do zhvillohej për goditjen e aktivitetit kriminal të personave që trafikonin lëndë narkotike të llojit kokainë nga Ekuadori në Greqi dhe më pas në Shqipëri, nëpërmjet rrugës detare”, tha Ardi Veliu.
Në pranga kanë përfunduar: Ardian Bega dhe Altin Myslimhaka ndërsa në kërkim është shpallur një person me iniciale G.M. Gjatë hetimeve të deritanishme rezulton se këta shtetas ishin pritësit e kësaj lënde narkotike në Durrës.
“Këta shtetas në bashkëpunim me njëri-tjetrin dhe persona të tjerë në Portin e Durrësit, duke shfrytëzuar faktin që kishin akses në hyrje dhe dalje në Port bënë të mundur nxjerrjen e një sasie të lëndës narkotike nga kontenieri ku ndodhej në sheshin e kontenierëve dhe dërgimin e saj në një zonë të sigurt që ata mendonin, por që është sekuestruar nga Policia gjatë operacionit”, tha drejtoi i policisë./ Opinion.al
