Rreth 1 milionë turistë të huaj kanë vizituar Shqipërinë në dy muajt e parë të vitit 2024. Lajmi është dhënë nga Ministrja e Turizmit dhe Mjedisit Mirela Kumbaro e cila ka publikuar shifrat në një status në rrjetin social “Facebook”.
Ministrja thotë se muaji shkurt i këtij viti ka patur 55% më shumë vizitorë se shkurti i vitit të kaluar.
“Fantastike shifrat e muajit shkurt, me 55% më shumë vizitorë se shkurti i vitit të kaluar, duke bërë që Shqipëria të presë rreth 1 milionë turistë të huaj vetëm në dy muajt e parë të vitit 2024”, shkruan ministrja Kumbaro në rrjetet sociale.
Ndërkohë, për dy muajt e parë të vitit 2024 kanë udhëtuar drejt Shqipërisë 41% më shumë turistë të huaj krahasuar me të njëjtën periudhë të vitit 2023.
Pritet që edhe këtë vit vendi ynë të ketë një numër të lartë vizitorësh.
