Ajo që kemi parë rrugëve të Shqipërisë këto muaj na sinjalizoi për një interes të shtuar të turistëve të huaj për vendin tonë. Këtë të fundit e konfirmojnë edhe shifrat zyrtare të Ministrisë së Turizmit.
Vetëm në muajin Korrik, 1.7 milionë vizitorë të huaj kanë zgjedhur të vizitojnë Shqipërinë, 26% më shumë sesa në Korrikun e vitit të shkuar.
Për gjithë periudhën Janar-Korrik Shqipëria ka mirëpritur mbi 5.1 milionë vizitorë, 31% më shumë të huaj sesa vjet. Shifrat tashmë zyrtare tregojnë se viti 2023 ka tejkaluar dukshëm vitin 2022, që njihet si viti më i mirë ndonjëherë në bilanc shifrash. Më besnikët mbeten vizitorët nga Kosova, që edhe këtë vit mbajnë vendin e parë në të njëjtat shifra si vitin e kaluar.
Sipas të dhënave nga Ministria e Turizmit, në krahasim me vjet, këtë vit vizitorët nga Spanja janë dyfishuar në numër. Të shumtë janë dhe ata që kanë ardhur nga Turqia, me një rritje prej 142%, nga Mali i Zi me 62% më shumë, Franca me 58% më shumë e Italia me 53% më shumë krahasuar me vitin që shkoi.
Ndërkaq marrëveshja për heqjen e vizave midis Shqipërisë dhe Kinës po ashtu ka dhënë frytet e saj, pasi këtë vit kemi pasur 152% më shumë vizitorë nga Kina. Për Ministren e Turizmit, Mirela Kumbaro, krijimi i infrastrukturës së nevojshme dhe organizimi i eventeve përgjatë gjithë vitit kanë qenë ambasadorët më të mirë për promovimin turistik të Shqipërisë./tvklan
