Prej dy ditësh media greke mbush faqet me shkrime për një superoperacion të policisë greke për kapjen e një skafi me 1.6 ton marijuanë, që ka dyshime se u ngarkua në jugun e Shqipërisë. Në pranga kanë rënë 6 shqiptarë, dy italianë, dy grekë dhe një bullgar. Në mesin e tyre është edhe një biznesmen i njohur grek që ka disa restorante në ishullin e Mikonos. Sipas hetimeve nga policia greke, ky biznesmen u siguronte gomonet trafikantëve.
Gazeta e madhe greke “Kathimerini” shkruan se ngarkesa prej 1.6 ton marijuanë kishte destinacion Turqinë. Në kthim grupi kriminal kishte planifikuar të sillte në Shqipëri një ngakesë heroine. “Kathimerini” shkruan gjithashtu se kjo organizatë kriminale qëndron pas dy rasteve të trafikut të drogës në Prill dhe Shtator 2017 nga Shqipëria në Itali.
Në rastin e parë, u tentua të trafikoheshin drejt brigjeve italiane 1.5 ton hashash dhe u arrestuan shtatë persona, dy grekë dhe pesë shqiptarë. Kurse rasti i dytë ka të bëjë me trafikun e 2.3 ton hashash sërish drejt Italisë me një gomone në pronësi të një biznesmeni grek. Një shqiptar 24-vjeçar dhe një 63-vjeçar italian u arrestuan për këtë ngjarjen. Sipas burimeve të “Kathimerini”, marijuana i përket bandës së Habilajve dhe njëri prej shqiptarëve të arrestuar është i afërm i Saimir Tahirit. Ndër të arrestuarit ishte dhe një i afërm i ish-ministrit të Brendshëm të Shqipërisë”, shkruan gazeta greke “Kathimerini”.
Në morinë e gjithë këtyre informacioneve që dalin nga policia fqinje dhe citohen nga media, policia shqiptare hesht. Opinion.al pyeti zëdhënësin e Policisë së Shtetit i cili tha se nuk ka informacion nga ana jonë lidhur me këtë rast trafiku ndërkombëtar. Pyetja kryesore që shtrohet është: A u krye ky operacion vetëm nga policia greke pa dijeninë e policisë shqiptare? A po vazhdon të trafikojë drogë grupi i Habilajve edhe pas arrestimit në Itali të disa prej anëtarëve të bandës?!/Opinion.al
