Gjykata ka dhënë masën e sigurisë arrest me burg për Sekretarin e Përgjithshëm të Ministrisë së Financave Arlind Gjokutaj, së bashku me zyrtarin e këtij institucioni, Fatmir Hoxhaj dhe Alban Rulin, përmbarues.
Gjokutaj nuk u paraqit në seancë, pasi sipas avokatëve të ai ka shfaqur probleme kardiake, dhe më pas është transportuar në spital.
Ndërkohë avokatët kanë kërkuar kohë për t’u njohur me dosjen. Në seancë kanë qenë të pranishëm vetëm drejtori juridik, Fatmir Hoxhaj dhe Alban Ruli, përmbarues.
Dy zyrtarët dhe përmbaruesi Ruli akuzohen për “Shpërdorim detyre”, ndërsa dëmi që i kanë shkaktuar buxhetit të shtetit është 1.2 mln euro.
Ata kanë firmosur shkresa për t’i kaluar 1.2 milionë euro shtetasit Ilir Thana, i cili është trajtuar si ish-pronar për privatizimin e një objekti magazinë në vitin 1992, edhe pse nuk e gëzonte titullin. Thana kishte marrë fillimisht një shumë prej 400 mijë eurosh ndërkohë që pjesa tjetër pritej t’i transferohej në muajt në vazhdim.
