-Kulturë

Pas humbjes tragjike të të birit Flutura Açka, rrënqeth me poezinë dedikuar atij

               Publikuar në : 11:12 - 07/06/18 |
E SH

Një muaj më parë shkrimtarja e njohur humbi djalin e saj 18-vjeçar nga një sëmundje e rëndë. Nuk ka si dhimbja e nënës për humbjen e fëmijës, dhe nuk ka fjalë që e përshkruan atë. Por shkrimtarja e njohur, e ka hedhur dhimbjen në letër, duke i dedikuar birit të saj të ndjerë një poezi buruar nga shpirti. Flutura Açka na ka rrënqethur me këto vargje të cilat transmetojnë gjendjen e saj shpirtërore.

Roja i dritës

Ti kishe kaq qiell brenda teje,
sa dhe dielli bante ndejë n’tandin sy,
e drita xhelozohej kur fikej mramjeve,
horizontit ankohej,
se s’mundej me të ngja ty.
Kurdisur n’buzëqeshje
kraharori yt ende jep gurgullimë,
andrrës dhe zhgjandrrës të çajë thurjen e pezmët
të trishtimit tonë, mësyn.
Është larg, n’rini të përjetshme,
mbretërinë e Askundit lyen me bojë njeriu,
i pakorruptueshmi shpirt,
i papërlyemi kurm,
e pavramja ndjenjë,
xeherore qe s’e prek kush thellimave,
ekzistencë diku, gega im,
“the terrible beauty”* në më t’gjatin mërgim.
Ti dashuria që ecje,
ti buzëqeshja baretëse,
ti i thikti rrezatim mirësie,
kushedi në ç’mors lexon tani,
vajin tonë që lutet për kthim.
Ti roja i dritës,
përgjon errëtitë që aviten të na nxijnë,
të na derdhin mjerim.
Tani shkel në dhera të pastra,
e ëndrrash të qashtra shtigjesh nget,
ti nezra e përjetshme,
nuk fikesh si kandil,
as flakë qiriri topitur erës,
shembëllim i largët i një ylli kushediku,
tatuazh i shpirtit mbet…
“The terrible beauty” (bukuri mizore), varg i John Keats

Pas