Bota, Kryesore

Jeruzalemi kryeqytet i Izraelit, e gjithë bota kundër Donald Trump

Arabia Saudite, aleati më i madh i Shteteve të Bashkuara të Amerikës në botën arabe, u rreshtua krahas vendeve që dënuan ashpër vendimin e Donald Trump për të njohur Jeruzalemin si kryeqytet të Izraelit.
Në një komunikatë për shtyp, Mbretëria saudite tha se ky hap i ndërmarrë nga Trump ishte i pajustifikueshëm dhe i papërgjegjshëm.
Por kritika vijnë nga çdo cep i botës ndaj vendimit të Trump, e këto nuk mungojnë as nga aleatët.
Kryeministrja britanike Theresa May tha se nuk është dakord me vendimin e SHBA-ve, që nuk ndihmon për paqen në rajon.
Në të njëjtin kuadër u shprehën Emmanuel Macron dhe Angela Merkel, respektivisht presidenti i Francës dhe kryeministrja e Gjermanisë, të cilët thanë se nuk mbështesin vendimin amerikan.
Sigurisht që kjo medalje ka edhe një anë tjetër, pavarësisht se më të vogël, atë të Izraelit që e përshëndeti vendimin amerikan, duke e konsideruar një ditë historike.
Nuk është i këtij mendimi kreu i OKB-së, Antonio Guterres, i cili tha se ky është një moment ankthi i madh dhe se nuk ka opsion tjetër për paqen në rajon veç zgjidhjes dyshtetërore. Mësohet se, 8 nga 15 anëtarët e Këshillit të Sigurimit kanë kërkuar një takim urgjent për të diskutuar këtë çështje, që sipas tyre u jep fund përpjekjeve për paqe.
Por s’është i këtij mendimi Trump, i cili tha se njohja e Jeruzalemit nuk dëmton përpjekjet e administratës së tij për të zgjidhur konfliktin mes izraelitëve dhe palestinezëve.
Megjithatë, nuk duken të gjithë të bindur për këtë, pasi zyrtarë të Shtëpisë së Bardhë, me kusht anonimiteti, thanë për CNN-in se pritet që priocesi i paqes të dëmtohet përkohësisht nga njohja e Jeruzalemit, një çmim që administrata ishte e gatshme ta paguante për mbajtjen e një premtimi të fushatës.
Abu Mazen: SHBA-të po heqin dorë kështu nga roli i ndërmjetësuesit
Në një fjalim drejtuar Kombit, presidenti palestinez Abu Mazen shpjegoi se “vendimi i sotëm i Trump është i barabartë me një heqje dorë nga Shtetet e Bashkuara për rolin e ndërmjetësit të paqes”, duke nënvizuar gjithashtu se si ky pozicion i ri është në kundërshtim me të gjitha rezolutat ndërkombëtare mbi Jerusalemin, raporton TgCom.
Abu Mazen tha gjithashtu se kishte urdhëruar delegacionin diplomatik palestinez të largohej nga Uashingtoni dhe të kthehej në shtëpi. “Jeruzalemi – këmbënguli ai – është kryeqyteti i përjetshëm i shtetit të Palestinës”. Presidenti palestinez akuzoi gjithashtu Trumpin për ofrimin e një shpërblimi të pamerituar për Izraelin “i cili gjithashtu shkel të gjitha marrëveshjet”, raporton TgCom24.
Tetë vende, thirrje për mbledhjen e Këshillit të Sigurimit të OKB-së
Tetë shtete anëtare të Këshillit të Sigurimit të Kombeve të Bashkuara (Bolivia, Egjipti, Franca, Italia, Senegali, Suedia, Britania e Madhe dhe Uruguai) kanë bërë thirrje për një takim urgjent për vendimin e Presidentit Trump, bëjnë të ditur burimet diplomatike të OKB-së. Mbledhja e Këshillit të Sigurimit duhet të mbahet deri në fund të javës, ndoshta të premten.
Macron: Vendim i mjerueshëm
Përveç reagimit të parashikueshëm palestinez, reagime kundër iniciativës së Trump vijnë edhe nga aleatët e SHBA. Presidenti francez, Emmanuel Macron, për shembull, flet për një vendim “të mjerueshëm”, dhe duke i ftuar të gjitha palët që të qetësohen, thekson se Elizea në çdo rast “nuk e miraton” zgjedhjen e Shtëpisë së Bardhë.
Guterres: Në rrezik perspektiva e paqes
I ashpër komenti edhe nga sekretari i përgjithshëm i OKB, Antonio Guterres, sipas të cilit “vetëm duke realizuar vizionin e dy shteteve që bashkëjetojnë në paqe dhe siguri, me Jerusalemin si kryeqytetin e Izraelit dhe të Palestinës, të gjitha çështjet mbi statusin do të zgjidhen në mënyrë përfundimtare përmes negociatave dhe aspiratat legjitime të të dy popujve do të arrihen”. Numri një i Kombeve të Bashkuara thekson se “që nga dita ime e parë këtu kam deklaruar vazhdimisht veten kundër çdo mase të njëanshme që rrezikon perspektivën e paqes”.
BE: Jeruzalemi të jetë kryeqyteti i dy shteteve
“Bashkimi Evropian shpreh shqetësim të madh pas njoftimit të Presidentit Trump për Jeruzalemin dhe pasojat mbi perspektivat për paqe”. Kjo është deklaruar në një deklaratë nga Përfaqësuesja e Lartë i BE-së për Punë të Jashtme, Federica Mogherini, duke nënvizuar se “duhet të përmbushen aspiratat e të dyja palëve dhe duhet të gjendet një rrugë përmes negociatave për të zgjidhur statusin e Jeruzalemit si kryeqytetin e ardhshëm të dy Shteteve”.
Merkel: Gjermania kundërshton vendimin e Trump
Kancelarja gjermane Angela Merkel u distancua nga njohja e Presidentit të SHBA Donald Trump të Jerusalemit si kryeqyteti i Izraelit. “Qeveria gjermane nuk e mbështet këtë sjellje, sepse statusi i Jerusalemit duhet të negociohet brenda kuadrit të zgjidhjes mes dy shteteve”, shkroi më ‘Tëitter’, zëdhënësi e Kancelares, Steffen Seibert.
Ankaraja: Vendimi i SHBA-ve minon paqen dhe stabilitetin
“Ne dënojmë deklaratën e papërgjegjshme të administratës amerikane për të njohur Jerusalemin si kryeqytetin e Izraelit” që “do të ketë efekte negative në paqen dhe stabilitetin në rajon”. Kështu shkruan në “Twitter”, Ministri i Jashtëm turk, Ahmet Cavusoglu, duke botuar një shënim ku i kërkohet administratës amerikane “të rishqyrtojë këtë vendim të gabuar”.

Lajmi ParaLajmi Pas
« Kthehu Rifresko